Biblioteca IES Agra de Raíces.

26/9/22

  BENVIDOS AO CURSO 2022/2023 CON LIBROS COMA AREA!

Un ano máis, o club de lectura LIBROS COMA AREA! volve a comezar as súas actividades, ao longo da semana do 3 ao 7 de outubro realízaremos as sesións de presentación. Nos últimos días, nenos e nenas de todos os cursos apuntáronse pero aínda queremos máis!!! Se queres participar, só tes que pasar pola biblioteca e falar cos responsables da mesma, alí recibirás toda a información necesaria.


O alumnado que mostrou interese en participar será avisado do horario das sesións de presentación ao longo da semana anterior. Esta notificación farase na súa propia aula polo coordinador do club de lectura. Tamén aproveitaremos para recordar que segue aberta a posibilidade de apuntarse no club para todos os alumnos e alumnas que o desexen.

13/6/22

 

REMATANDO O CURSO...

Neste mes de xuño tíñamos grandes plans pero os deuses do vento xogaron na nosa contra. O día 8 estaba programada a nosa saída ao monte Pindo en compañía dos rapaces e rapazas do IES Fin do Camiño de Fisterra e do IES Maximino Lema de Baio, sen embargo a choiva non nos permitiu realizar esta xuntanza, agardamos poder xuntarnos para o curso que vén.


Tras esta decepción, decidimos xuntarnos todos os membros do club de lectura para despedir o curso e realizar a actividade final da iniciativa "Unha mensaxe enterrada nos libros". Cada un dos rapaces e rapazas de "Libros coma aréa!" asinou o libro que elixiron para que fora incorporado aos fondos da Biblioteca e fixeron unha dedicatoria, agardamos que os lectores do futuro gocen deles coa mesma paixón.






FOI UN GRAN ANO, AGARDAMOS QUE O CURSO QUE VÉN AÍNDA SEXA MELLOR!!!

27/5/22

 

AS PORTAS DO AGRA, FOGAR DE LIBROSCOMAAREA, FALA AMIGO E ENTRA!!



Ao longo do mes de Maio o alumnado dos grupos de 1º  e de 2/3º da ESO do club de lectura participaron nun obradoiro de escritura élfica.  Durante dous venres (días 13 e 20) os nenos e nenas de "Libros coma area" visitaron a Terra Media e recibiron unhas ensinanzas básicas en quenya, a linguaxe dos altos elfos de Valinor. Este idioma foi creado por J.R.R. Tolkien, autor dun dos libros de lectura deste ano, "O Hobbit"; a continuación mostramos como sonaría tal e como el o concibiu.




Despois de estudar brevemente o alfabeto élfico e unhas normas básicas os nosos valentes alumnos e alumnas atrevéronse a escribir os seus nomes con estes caracteres.




Aquí temos a Andrea, unha das nosas alumnas máis avantaxadas, pronto poderá partir desde os portos grises e unirse á compañía dos Valar.

 



Por outra banda tamén queremos comentar que as alumnas de 4º da ESO e 1º de BACH reuníronse para falar do último libro que leron, "Os nenos da variola". Este ano están devorando novela histórica e, se os exames o permiten, non será a última deste curso.


Ilustración realizada pola alumna Laura Martínez de 4º da ESO


25/4/22

 

FELIZ DÍA DO LIBRO!!

Este sábado, día 23 de Abril, celebrouse o día do libro e o club de lectura "Libros coma area" non podía deixar pasar esta data sen facer algo especial para conmemorala. Fai xa meses que comenzamos a preparar un vídeo para promover a lectura entre os máis pequenos e agora podedes ver o resultado.

Foi un traballo realizado con moita ilusión e agardamos que vos guste, tamén vos recomendamos ver o vídeo ata o final pois, como nunha película de superheroes, temos escena postcréditos.


Por último queremos agradecer ao CEIP Eugenio López, ao CEIP Plurilingüe Santa Eulalia de Dumbría e ao CEIP do Pindo a súa colaboración na divulgación deste vídeo.



20/4/22

 

UN CLUB DE PELÍCULA!!

Nos días previos ás vacacións de Semana Santa, o alumnado participante do club de lectura "Libros coma area" estivo a realizar a gravación dun vídeo. Foi un desafío apaixonante e a verdade é que nos rimos un montón. Nos próximos días mostraremos o resultado, agardamos que vos guste!!!

24/3/22

 

DESENTERRANDO LIBROS DA AREA

Continúan as nosas actividades neste mes de marzo, as integrantes do Club de lectura "Libros coma area" fixeron memoria sobre os libro que as marcaron ao longo da súa vida e que queren compartir cos demais. Tras reunir unha lista digna dos mellores premios, coa colaboración do equipo de biblioteca do centro, adquirimos algúns exemplares para que eses libros para o recordo tamén estean nos fondos da biblioteca do centro.



Por outra banda, o grupo de alumnas de primeiro da ESO devorou outro libro máis, "Nós seis" de Julia Lago. Esta obra trátase dunha banda deseñada que conta as vivencias dunha rapaza nun internado de época franquista. Agora, o seguinte desafío é unirse á lectura do Hobbit, o cal xa están lendo ás compañeiras de 2º e 3º da ESO.


10/3/22

 

UN ANTROIDO DE PELÍCULA

A comezos de febreiro, o equipo de Biblioteca e a coordinación do Club de lectura "Libros coma area", publicábamos as  bases do concurso "Entroido cinematográfico 2022", a celebrar o 25 de febreiro cun photocall na biblioteca do centro. Foron moitos os grupos participantes, resultando gañadoras o grupo de 1º ESO C formado por Daniela Fernández, Sandra Casáis, Sofía Ana Wrona, Xana Corbelle y Alba Trillo, coa sua caracterización de "Stranger Things".  Aquí as podedes ver, e serán agasalladas cuns vales para desfrutar dunha merenda na cafetería do centro.  Parabéns!!

Maís abaixo tendes algúns dos outros grupos participantes, incluindo a comparsa dos "profes" coa representación da película "Sufraxistas", así como a foto a presentación dixital con tódolos participantes no seguinte enlace:

https://docs.google.com/presentation/d/13Ok3YXlA1T5w0LQZIp23U8fDbt-2KgUY/edit#slide=id.p1



Grupo gañador "Stranger Things" de 1º ESO C